ሰሞኑን ነው
አሉ…
ደጋግ ቅዱሳን በገነት ውስጥ ያሉ
በድንገት በእግዜር ድምጽ ‹‹ተነሱ!›› ተባሉ
…ደጋግ ቅዱሳን በገነት ውስጥ ያሉ
በድንገት በእግዜር ድምጽ ‹‹ተነሱ!›› ተባሉ
ቅዱሳን ተነሱ እግዜር ተናገረ
በየሀገራቸው እየዘረዘረ….
…
‹‹ምንም እናንተ አሁን -
በሥጋ አርፋችሁ በገነት ብትኖሩ
አውቃለሁኝና -
ሁል ጊዜ በመንፈስ እንደምትበሩ
ስለየአገራችሁ ወቅታዊ ሁኔታ
እስኪ ተናገሩ ‹‹ችግሩ›› እንዲፈታ !››
ብሎ እንደጨረሰ አምላክ ንግግሩን
‹‹ችግር›› የሚለው ቃል አስታውሶት ችግሩን
ፊቱ ሀዘን ከቦት ቁጣው እንደጋለ
ቅዱሱ አርበኛ ጴጥሮስ ብድግ ! አለ፡፡
…
‹‹ምነው ግን ፈጣሪ ሁሉን እያወቅኸው
የሀገሬን ነገር እንደዚህ ቸል አልኸው ?
ደግሞስ እኔ ላንተ ምኑን እንድነግርህ
‹ፈጣሪ ፍጡርህን› ትጠይቀኛለህ ?››
…
እግዜርም መለሰ
የጴጥሮስን ራስ በእጁ እየዳሰሰ…
‹‹ረጋ በል ጴጥሮስ… ማወቁን አውቃለሁ
ግና ከአንተ አንደበት መስማትን እሻለሁ፡፡
…
ምነው ረሳኸው …?
አዳም በለሲቱን ተው እያልሁት በልቶ
በወደቀ ጊዜ ከጸጋው ተራቁቶ
‹አዳም ወዴት አለህ?› ብዬ የጠየቅሁት
ይመስልሃል ያኔ ቦታውን ያጣሁት?
መስማት ፈልጌ እንጅ ከእርሱ ከአንደበቱ
‹እንዲናዘዝልኝ ይቀር ዘንድ ኃጢአቱ›፡፡
…
ምነው ረሳኸው …?
እድሜህን በሙሉ ያስተማርኸው ወንጌል
ካህናት ሕዝቡን ከኃጢአቱ ወንጀል
ይፈቱት ዘንድ ሥልጣን ለምን ሰጠኋቸው?
የማይድኑ ሆነው ነው እንዲያው ብምራቸው ?
ስለፈለግሁ እንጅ በጸጋ እንዲከብሩ
‹ባለሥልጣን› ሆነው እንዲፈቱ እንዲያስሩ፤
ለማጠየቅ እንጂ የእኔ የፍርድ ዋጋ
ተሰጥቶት በጸጋ…
በሰው እጅ እንዳለ እንዳይዘነጋ፡፡
…
በመንፈስ ተፈጥሮህ -
የማወቅን ሥልጣን ላንተም ስለሰጠሁ
ያው እኔ ማውቀውን -
ከአንተ ከአንደበትህ ማዳመጥን መረጥሁ፡፡››
…
ቀዝቀዝ አለ ጴጥሮስ ከቁጣው በረደ
ዓይቶ ለመመስከር -
በመናፍስት ፍጥነት ወደእኛ ወረደ
እንደ ብርሃን ፈጥኖ እንደ መልአክ በ’ሮ
ኢትዮያን ዳር ከዳር አያት ተዟዙሮ
ወዲያው ተመለሰ ፊቱን ባ’ዘን ቋጥሮ ::
…
ምክንያቱም ፡-
ሀገሩን እንዳያት ልቡ ይበልጥ ደማ
ያው እንዳለች አለች -
በተለያዬ አጽናፍ በድህነት ቆማ
…
ምሥራቁ ድርቅ ነው ሰሜኑም ተርቧል
ሕዝቡ ሰላም ርቆት መንፈሱ ተዋክቧል
በዚህ ሁሉ መሐል… ‹አንዳንዱ ግን ጠግቧል›፡፡
…
እናም ተመልሶ…
ከእግዜር ፊት ቀረበ እንባ እያቀረረ
አንገቱን በሀፍረት እንዳቀረቀረ
‹‹አየህልኝ አምላክ…›› መናገር ጀመረ…
‹‹አየህልኝ እግዜር !
የገዘትኋት ምድር …
ፍጥረትህን በሚገድል አረመኔ ፋሽስት ቅኝ እንዳትገዛ
ከነፃነት ማግስት …
በድህነቷ ላይ በጥላቻ መንፈስ የፍጥኝ ተይዛ
እግርህ የረገጠው አፈሯ እሾህና አሜከላ አብቅሎ
ጨለማዋ ገዝፎ ያ የእምነት ልቧ ቂም በቀልን አዝሎ
ምነው ዛሬስ ባልሄድሁ !
ሕዝቦቿ እርስ በርስ…
ሲከፋፈሉ አየሁ
ሲሰራረቁ አየሁ
ሲጠላሉም አየሁ
ሲ ገ ገ ዳ ደ ሉ … አ የ ሁ !
ባይኔ ነው ያየሁት ዓይኔን አምነዋለሁ ፤
ይሄን ያሳየኸኝ ምን በድየሃለሁ ?
…
በሥጋዬም ሆነ አሁንም በነፍሴ እረፍት ስላጣሁኝ
በወላጅ እናትህ በማርያም በስሟ አምልሃለሁኝ ፡፡
ኢትዮጵያውያንን…
በሥጋም በነፍስም እረፍት አሳጥተህ እንዲህ ከምትቀጣን
ት ች ላ ለ ህ ና …
እንዳልነበርን አ’ርገን ራስህ ለራስህ በሰጠኸው ሥልጣን ፡፡››
ሲለው እግዜርም ትንሽ ፈገግ ብሎ
ጥቂት ወደ ጴጥሮስ ራሱን አዘንብሎ…
‹‹አይ ሰው መሆን ደጉ…
እየውልህ ጴጥሮስ አንተ ጀግናው ልጄ!
ይሄን ሁሉ ችግር -
በዝምታ ማየው መስሎህ ነው ወድጄ ?
በእግዜርነት ትዕግሥት !
በአምላክነት ምህረት ! እንጅ ተገድጄ ፡፡
…
በል አሁን ከቁጣህ ትንሽ ተረጋግተህ
ጓደኞችህንም በዚሁ አወያይተህ
ነገ እናወጋለን ከክፉ እስከ ደጉ
መለየት ግድ ነው -
አብሮ እንዳይቀጣ ተኩላውና በጉ !!!››
…
አለውና እግዜር በዚህ ተለያዩ
ሰላም ካሳደረን…
እንሰማቸዋለን ነገ ሲወያዩ ፡፡
ሰላም እንድናድር ………. ‹‹ትጉና ጸልዩ !››
(©መላኩ አላምረው - መለኛ ሐሳቦች©)
(ከበድሬ ትዩብ የተወሰደ)
No comments:
Post a Comment